६ सय फिट अग्लो सिसाको झोलुंगे पुलमा यसरी गरियो सामुहिक योगा

५ सय ९० फिटको उचाइमा रहेको ९८४ फिट लामो झोलुंगे पुल, जसको पिँध काँचको छ र खुट्टाभन्दा तल डरलाग्दो खोँच छ्यांगै देखिन्छ ।

सायद यस्तो पुलमा हिँड्न ठूलै साहस बटुल्नुपर्छ र लरतरो मानिस बिचमै ढल्नसक्छ डरले । तर चीनको सिनिउझाइ नेसनल जियोलोजिकल पार्कमा रहेको यो काँचको पिँधवाला झोलुंगे पुलमा हालै १ सय जना युवतीहरुले गज्जबको सामुहिक योगा प्रदर्शन गरे ।

हुनान प्रान्तस्थित युयांग सहरमा रहेको यो पुलले दुइवटा डाँडालाई जोडेको छ र बीचमा डरलाग्दो खोँच छ । योगाका पारखीहरुले गत बिहीबार नोभेम्बर ५ मा आफ्नो कलात्मक योगा प्रदर्शनका लागि यहीँ पुललाई रोजे । त्यसक्रममा उनीहरुले विभिन्न योगाशनहरु प्रस्तुत गरे ।

हरीत जिवनशैलीको अवधारणलाई प्रवर्धन गर्नुका साथै मानिस र प्रकृतिबीचको मिलापको सन्देश दिनका लागि यी योगी युवतीहरु यस्तो साहसी कार्यमा जुटेका बताइएको छ ।

पहेँलो टप्स र सेतो सुरुवाल लगाएका युवतीहरुले योगाभ्यासकै पोजमा परम्परागत चिनिया नाच हजार हाते बुद्ध पनि प्रदर्शन गर्न भ्याए ।